عالم مطوري الويب هو عنوان حلقة هذا الاسبوع في برنامج اذاعة نت , الذي تم بثها على اثير اذاعة الرياض وهو من اعدادي انا والاخ علي الغبيشي و من تقديم الاخ علي الغبيشي وكان النقاش يدور حول تعريف المصادر المفتوحه و الويب 2 , وشرح مبسط للمترجمات و الحديث عن الرياض و الشرقية و مكة قيكس و دورها في تطوير و تنمية مهارات المبرمجين و المطورين العرب ,
ضيوف الحلقة هم
الاخ بدر نايل
احد اقدم البرمجين في الوطن العربي , ورئيس فريق البرمجة في بوابة المعرفة التابعه لوزارة التربية و التعليم
الاخ عبدالله عيد
احد مشرفين مكة قيكس , معيد في جامعة ام القرى , وهو متخصص في بناء لغات البرمجة
الاخ رائد السعيد
احد مشرفين الرياض قيكس
الاخ صالح الزيد
احد مشرفين الشرقية قيكس
اللقاء كان ممتاز جداً
للتحميل او الاستماع اضغط هنا ( الحجم 12 ميجا )

التصنيف: ندوات و لقائات | تعليق واحد |

هذا الشارع , له قصة طويلة , وهي يوم كنت انا و الاخ فيصل سالم , في امريكا , و بالتحديد بولاية سان فرانسيسكو , اعجبنا هذا الشارع واسمة شارع عنزه , والي لفت انتباه فيصل صديقي , ان فيه على واحد من البيوت و بالتحديد البيت الي ورى لوحة الشارع فيه صميل ( الصميل الي يحطون فيه الحليب ) طبعاً بيت امريكان وش جاب الصميل , تقدم فيصل للبيت وسمع عجوز تغني , قصيدة معروفة للعجايز هي ( و بحجة الكاسات , مقدر يا غالي , امي و بوي بالبيت ) بهذي اللحضة , فيصل قام يصفق و تذكر ايام كان بالرياض ويغني مع العجوز , طبعاً العجوز استغربة وش بلاهـ هذا البدوي الامريكي المهبول يصفق بالشارع طبعاً تفكرنا امريكان , قربت عندنا العجوز و جلسة تسولف معنا و كانت لهجتها بدوية لكن باللغة الانجليزية و بالتحديد لغة الشوارع عندهم ( دليل ان العجوز حوامة ) , وقالت لفيصل , وش تسون هنا يا وليدي , فيصل خنقته العبرهـ لانه تذكر جارتهم بالنسيم , الي اسمها حمده وهي تشبة العجوز , و تذكر بنتها الي اسمها عيدهـ الي كان يحبها , وقصته معاها يوم حبو بعض بعد ما كانت البنت تستلكع عليه كل يوم و تكش عليه ( الكشة هي فتح اليدين و التوجيه على الوجهه بكليهم ) ما علينا تعرفنا على العجوز وطلعت هي حمده و حلفة علينا ما نمشي كود يجي راعي البيت , وكنا نفكره زوجها , لكن الي صدمنا ان راعي البيت هو صديقنا , هاني عودهـ , والملقب في امريكا بـ ابن سمدان , طبعاً العجوز البدوية الامريكيه تعرفة عليه يوم كان هاني يتمشى في شيكاغو , وهو يعتبر من اكبر عرابجة شيكاغو , وتذكرة ولدها الي توفى وانه يشبهه و قالت تعال ابيك تصير ولداً لي و راعي البيت و ابي ازوجك بنتي عيدهـ الي هي حبيبة فيصل الخبلة , و هاني تزوج عيدهـ وصار راعي البيت
طبعاً بعد ما قابلنا هاني , فيصل كان مقهور منه لانه يعرفة من ايام الرياض , لان هاني ساكن بالنسيم وفيه معرفه بينهم لان هاني وفيصل كلهم يجلسون في مقهى العسكر بالنسيم , وكان هاني متخصص بموضوع الـ كيلوجر ودايم يحاول يخترق ايميل فيصل , بس يخاف من اخوه الكبير لان كانو كلهم صغار بالسن و اخو فيصل ابو عبدالله عربجي , ومسوي زحمه عليهم بسيارته المورسيدس الي راحت تشليح اخر حياتها .. إقرأ المزيد…

التصنيف: شخابيط | 8 تعليقات |

هذي الطياره هدية من احد الاشخاص العزيزين, ما ادري وش المناسبة بس الزبده قالي رح للمكان الفلاني فيه اغراض لك وهذا اونا رايح ولقيت طياره , بالبداية استغربة الموضوع وبعدها صدمني سعرها شوي , والله يعطيه العافيه عليها ,
بعد ما وصلت البيت قعدة اجمع الشباب كلهم عشان يمسكونها اذا طارة بعيد ولا ابلش فيها , اول مره الله ستر طارة اكثر من 90 متر و هي نازله صار خلل فيها بارتفاع 25 متر ولا ادري وش السبب لانها وهي بالجو وقفت , ولا لقينا شي بالصندوق الاسود :d << حلوهـ خلل

الزبده انها طياره ممتازه و الحين تقريباً انا احد الطيارين في الحي عندنا , لان بهطياره , بعضهم راح يقولون وش ولد الكاش هذا والبعض الاخر راح يقولون وش هالبدوي المهايطي هذا , بس ما علينا اهم شي اني الحين اذا قلت اني طيار كلامي صحيح :d

على فكرة : ترى الطياره موجوده بالصوره على اليسار بس مهي واضحه يمكن

التصنيف: صوره و صوت | 6 تعليقات |

بعد تدوينتي قبل امس بخصوص موضوع مذاكرتي و النتيجه كانت حرماني من المادة الي كان عنوانها [ من القراده ” بعد التعب و المذاكره أخذ حرمان من المادة “ ] اليوم كان عندي اختبار مادة الاحصاء العام و مادة التمويل و الائتمان المصرفي , طبعاً كا عادتي السنوية طلعت للاختبار بدون مذاكره وانا مرتاح نفسياً و عاطفياً لان عارف لو حملة الماده ما عندي مشكله لان هذا نصيبي فيها , مهو زي سالفة اختبار مبادئ و مهارات الاتصال الي ذكرتها بالتدوينه الاخيرة مع العلم انها الماده الوحيده الي منضبط فيها و مسوي نفسي مهتم مع الدكتور واخرتها كافئني بـ حرمان الماده , الزبده , ان اليوم اختباري دخلته وانا ما اعرف شي غير اكتب اسمي والحمد لله على كل حال اختبار الاحصاء العام جايب فيه 29 من 30 طبعاً بسبب البراشيم لان الماده فهمتها من البراشيم الي معي لان الدكتور كان مغيير بالارقام والاختبار الثاني الي هو التمويل و الائتمان المصرفي احس ان الماده سهله ولا تبي لها مشاكل و الحمد لله بعد الدرجه اتوقعها تمام يعني شبه كاملة بعون الله , طبعاً المميز فيها الدكتور [ابو ثنين] الله يزوجه مهو من النوع الي مخه مقفل من المحاضرين و الدكاتره همه ان تكون الاجابه صحيحه ولا يلزمك بالقانون والله يزوجه ان شاء الله , وصدق الدراسة غريبة , تذاكر تسقط , ما تذاكر تطلع منتاز ^ _^

التصنيف: غير مصنف | 3 تعليقات |

المقرود مقرود , لي تقريباً اكثر من 9 سنوات اخر مره ذاكرة و قبل يومين قررت اني اذاكر بسبب ان الانترنت انفصل عندي بالبيت و من زود الكشخة و الوناسة مصور الكتاب افكر نفسي راح اصير من الدوافير ( الدوافير يعني الشاطرين و الي وهم نايمين يجيبون مدرسين خصوصي ) الزبدة ان بعد ما ذاكرة مادة ( مبادئ إدارة الأعمال ) الي حملتها بالكلية 3 مرات بسبب عدم احترامي لمواعيد المحاظرات و بالاخير يعطوني حرمان , طلعت للاختبار يوم السبت و متفرغ بشكل كلي للاختبار دخلة الاختبار و انتهيت منه خلال اقل من 15 دقيقة أستأذنة من الدكتور وقالي لا تتاخر لان بعد الاختبار بساعه فيه محاظرة واذا تأخرت راح يرحمني لان عندي حرمان وهو معطيني اخر مهله يوم الاختبار عشان يسنى الي فات كله ,,, رجعت بعد الاختبار وشفت ان فيه شباب بالقاعه و افكرهم يختبرون قلت خلنا ننتضر وبعد طول انتضار من اللقافة قلت خلني اوري الدكتور خشتي اني مهتم , فتحت الباب وانا كلي ثقه و مبتسم ابتسامة الشطار , الدكتور ناظر لي بحقد و قالي توكل على الله و حلف انه راح يحرمني من الماده ( انا ضحكة بوجهه من زود الفهاوه ) وارتفع ضغطه زيادة و طلعت من المحاظرة وانا احس اني جبت العيد لان اكتشفت ان المحاظرة بادية وانا برى و الدكتور هذا ما يقبل تأخير دقيقة , الزبدهـ انها اول مره اذاكر من 9 سنين يمكن ودامها على كذا بلا مذاكره بلا هم , والله يستر من حرمان المادة

التصنيف: شخابيط | 6 تعليقات |

بسم الله الرحمن الرحيم ,
قبل دقايق كنت في احد مواضيع منتدى اصدقاء الاذاعه وكان مطروح برنامج تشغيل بعض الاذاعات العالمية وكان اعضاء المنتدى يبون برنامج يخص الاذاعات السعودية بنفس فكرة البرنامج المطورح ,, طبعاً بدوري انا قلت ليه ما ابرمج واحد زيه

وكانت هذا النتيجه( برنامج استماع للاذاعات السعودية على الجهاز )

رابط التحميل
تحميل مباشر
تحميل من 4shared

التصنيف: برامج و تقنية | 6 تعليقات |

بسم الله الرحمن الرحيم
بهذي التدوينة راح اشرح طريقة اخذ بكب خارجي للسيرفر , البعض يعتبرها صعبه شوي على المبتدئين في مجال السيرفرات ويمكن تكون بسيطة بالنسبة للمحترفين < يحس انه من المحترفين
اسرع طريقة و اسهل طريقة لاخذ بكب لسيرفر اخر هو نقل البكب من سيرفر الى سيرفر بالطريقة اليدوية الي راح نطبقها الحين
وشرحها راح يكون كا التالي
بالبداية نسمي السيرفرات عشان ما نضيع بينها
السيرفر الي عليه المواقع راح يكون اسمة سيرفر A و السيرفر المراد وضع البكب الخارجي عليه يكون اسمة سيرفر B
بالبداية ندخل على السيرفر B الي راح ننقل عليه البكبات ونسوي فيه ملف بالاسم back-badr داخل مجلد الـ home
يعني راح يكون مساره على السيرفر الي اسمة B الي هو خاص بالبكب
home/back-badr/
حلو الحين عرفنا ان البكب راح يكون موجود على السيرفر الجديد الي عندنا ادخل مجلد الـ home باسم back-badr
الحين نبي ننقل البكب من السيرفر A الى السيرفر B ثم ندخل على السيرفر A وبعدها نتوجهه على مجلد البكب الي فيه ياخذ السيرفر البكب اليومي و الاسبوعي و الشهري
وهو من العادة يكون على المسار /backups/cpbackup
واحنا داخل المجلد cpbackup
نكتب الامر هذا
scp -P22 daily/* root@121.122.123:/home/back-badr/
ملاحظة : p22 هذا البورت الخاص بالشيل و daily هذا البكب اليومي
بعد كتابة الامر راح يطلب باسورد الروت وبعد ما نكتب باسورد الروت راح يتم النقل مثل الصورة التالية

واسف على الشرح السريع , لان كتبته الساعه 8 الصباح وانا مواصل

التصنيف: شروحات | أضف تعليقك |

اليوم بتكلم عن مدينة فيفا او جبال فيفا , طبعاً ذكرتها كا جبال لانها عباره عن جبال متصلة في بعضها وكانها جبل واحد حسب معلوماتي عنها ان كل جبل من جبال فيفا بأسم قبيلة من قبايلها , طبعاً فيهم الكرم وهذا الي خلاني ما تصل في احد من اصدقاي اهل فيفا يوم طلعة لها لان كان معي شباب ولا حبيت احرجهم في طلعتنا ,, لان اهلها الى الان متمسكين في عاداتهم و تقاليديهم وعندهم اكرام الضيف وتقريباً يشابهه كرم اهل الشمال ( مع احترامي للقبائل و العوائل )
كانت السفرة عباره عن رحلة عمل لمدة اسبوع كان ختامها مسك في جبال فيفا
وهذي بعض المعلومات الدقيقه عن فيفا حسب قرائتي عنها

• في فيفا كل بيت عندهم له اسم خاص فيه كانه لقب خاص فيه ونادر يكون فيه لقب متكرر لاسم بيتين من البيوت بالجبال
• طبعاً فيفا الي يميزها بعد ان فيها بيوت كثيره على شكل دائري .
• المقابر في فيفا كل عائله لها مقبرة خاصة فيها .. إقرأ المزيد…

التصنيف: ترحال | 3 تعليقات |

اليوم قررت اني ابعد شوي عن الانترنت كــا فترة نقاها و سياحة لمدة اسبوع من اليوم الاحد الموافق 4 – 5 – 1431 الى 9 – 5 – 1431 يعني تقريباً 5 ايام بالضبط ابي اتمشى فيها بالسعودية شوي كنت ابي استغل الفترة هذي بزيادة مهاراتي في لغة الـ php لان مبعد عنها شوي بسبب عدم وجود فكرة لكي يتم البدء في تطبيقها بهذه اللغه لكن ان شاء الله راح اتفرغ لها ساعه يومياً ان شاء الله بعد انتهاء الاجازه مع اني عارف ان ما راح اسوي شي ,, دام من كثر الشغل اطفي الجهاز و اروح اتابع سبيس تون فا كيف راح استمر بالبرمجة بهذه اللغه وانا ما عندي وقت ,,
الي يميز السفره مثل كل سفرة اني راح اسافر الى جيزان وهي تبعد بالضبط من بيتنا بالرياض الى مزرعتنا في جيزان تقريباً 1335 كيلو واغلب الوقت يكون بالتفكير و مراجعة حساباتي , يعني يمكن اعتزل الانترنت بسبب السفرة هذي
و زبدة الكلام ,,, باي يا انترنت لمدة اسبوع

التصنيف: شخابيط | 3 تعليقات |

يمكن يكون عنوان التدوينه شوي ماله داعي بس حاس اني كتبته بالطريقة هذي وما ابي اغيره لان مواقع اباحية كثير شغاله على الطريقة هذي ولا تحجب و هيئة الاتصالات حاطين رجل على رجل وشغلتهم حجب مواقع عاديه جداً وبالاخير يقولون خطاء من عندنا
اليوم عندي احد الاصدقاء عنده موقع خاص في العاب الفلاش تم حجبة من الاخوان في هيئة الاتصالات بدون سبب يذكر
المشكله الحاصلة لديهم هي
ان الحجب بدون تدقيق وفي بعض الاحيان مجال الواسطه طبعاً الواسطه بالحجب ممكنه لكن بفك الحجب غير ممكن لانه من جهه ثانية وهي من مدينة الملك عبدالعزيز تقريباً
الاشكالية الي صايرة ان هيئة الاتصالات نظام الحجب عندهم ما له قدرة على حجب بعض المواقع بسبب ( يعني الي ما يبي موقعه ينحجب يركز لان كل النقاط الي بذكرها مجربها انا ) طبعاً هذي الي اقصدها بانها ثغرة الحجب
1- السيرفرات السعودية : السيرفرات في السعودية المواقع الي عليها لا تمر على نظام فلترة الحجب طبعاً الي يبي عندهـ طريقتين يا ياخذ سيرفر من ناشر نت او ياخذ ستتيك اي بي و يحط موقعه ببيتهم و يتحدى الحجب
2- تغيير البورت الخاص بالتصفح : طريقة تغيير البورة بالسيرفرات صارة اكبير مصيبه عند الهيئة وهي النقطه الوحيده الي منتبهين لها طبعاً فيه مواقع كثير يغييرون بورت التصفح الى بورتات ثانية يعني مثل www.badr-s.com:1544 طبعاً لو موقعي محجوب وانا مغيير بورة التصفح الى 1544 راح يقعدون فتره عشان يقدرون يحجبونه مره ثاني
3- المجال الامن https : هذا من المشاكل الي تواجهه هيئة الاتصالات لان نظام الفلترة ما يحجب هذا النطاق

بالنسبة للمستفيدين من هم المواقع الاباحية الصوتية و المنتديات اصحاب الافكار المتنحه وداخله عرض على العالم

طبعاً في اكثر من طريقة لـ فك الحجب عن موقعك بس تبي لها واحد متفضي طبعاً الاخوان بالهيئة مثل ما يقول ابوي قليلين خطاء << عشان ما يحجبون موقعي
والعذر على الاخطاء الاملائية و الاسلوب السريع بالشرح لان عندي محاضرة بالكلية بعد 10 دقايق وانا الى الان ما حركة

التصنيف: شخابيط | 3 تعليقات |