بسم الله الرحمن الرحيم , هذا شرح لـ اساسيات ادارة السيرفرات ويمكن مقدمه بسيطه , او بمعنى اصح شرح سريع بحكم ان البدوي الي جالس يكتب الموضوع مرضان له كم يوم والصخونه ماسكه خفارهـ على راسه كل 6 ساعات ترجع له  فا عاد قلت خلني اكتب شي فيه فايدهـ لان بعض الاخوان يكون الموضوع عندهم فيه خربطه بالنقاط هذي , كان ودي الشرح للاساسيات فيه صور عشان الفايدهـ لكن انا بالدوام بوزارة الاعلام والاتصال مقفل كل البورتات يعني لو تأذن انجليزي ما تستفيد شي
بالبدايه نعرف كيف طريقة الدخول بالشيل زي الصورهـ هذي

طبعاً الي موجود بالصورهـ يطلب عنوان الاي بي او الهوست يعني حط اي شي يكون متصل بالسيرفر ( صاب دومين , دومين , اي بي ) اهم شي يكون له اتصال بالسيرفر وبالنسبه للبورت لازم يكون عندك رقم البورت ومن العادهـ اقلب السيرفرات يكون رقم البورت 22 وبعضهم يسوون فيها فلسفة عيال العجايز ويغيرون البورت الى 2222 ليه مدري مع العلم ان اغلب الهكرجيه على قولة يونس حافظ   يستخدمون اختراف الاجهزهـ ويمكن صدق تغيير البورت يكون كويس من باب الحمايه من الهكر الكبار طبعاً بعد ما ترعص على اوبن راح يفتح معك شاشه الشل يطلب منك اليوزر نيم و الباسورد ودخلهم عادي
وفيه ملاحظه لمتسخدمين اللينكس هي انهم ما يحتاجون تنزيل برنامج البيوتي او اي برنامج اتصال بالسيرفر لان افضل شي كتابة الامر هذا بالمحطه الطرفيه باللينكس
ssh root@123.123.123
وبعدها انتر طبعاً اذا كان البورت عادي مهو متغيير يعني البورت 22 اما اذا كان البورت متغيير مثلاً 4045 ينكتب الامر التالي
ssh root@123.123.123 -p4045
ملاحظة ترى 123.123.123 هذا رقم الاي بي حق الموقع وتقدر تحط رابط الموقع بدال الاي بي مهو واحد يقعد يناشب السيرفر وش بلاهـ ما يفتح وهو يكتب الامر هذا
نجي لاومر مهمه وانت داخل الشيل
او عملية
امر الاستعلام عن دومين يعني بدل لا تروح لاي موقع وتسوي فحص للدومين وتبي تعرف الدي ان اس وهل هو محجوز او لا ندخل على الشيل او على المحطه الطرفيه اذا كان جهازك لينكس ونكتب
whois badr-s.com
طبعاً راح يعطينا معلومات الدومين كامله طبعاً مثل ما قلت مستخدمين الويندز من داخل الشيل يكتبون الامر واللينكس من المحطه الطرفيه لان الويندز لمى ينفذون الامر راح يتم من خلال سيرفر لينكس فديته والله << وش رايكم فيه نوع من الهياط مسوي ولد دلع
العملية الثانية
الامر الثاني جاك واحد يبي بكب لموقعه وش تسوي ؟؟؟
اذا تبي تاخذ بكب لموقع اليوزر نيم حقه مثلاً badr تكتب هذا الامر
/scripts/pkgacct badr
بعد ما نكتب الامر نكتب
cd /home عشان ندخل على مجلد الهوم وراح نلقاهـ موجود داخل باسم
cpmove-badr.tar.gz الحين نبي ننقله البكب لمجلد الموقع الاساسي وش نسوي ؟؟
نكتب الامر التالي عشان ينقل البكب من مجلد الهوم الى مجلد الموقع الاساسي الي هو www او البوبلك هوتمل طبعاً الامر بالبدايه mv لنقله و cp لنسخه ولصقه يعني يضل موجود بالهوم بعد
mv cpmove-badr.tar.gz /home/badr/www/cpmove-badr.tar.gz
بالامر هذا راح يتحول البكب بموقعه بس لازم يعطيه تصريح 644 لان راح ياخذ تصريح ما ينقل فيه ولا ينسحب طبعاً طريقة عمل التصريح له من خلال الشل تكتب الامر هذا اسرع لك افضل من تدخل للمجلدات عشان توصل للبكب يعني تضربه من بعيد
chmod 644 /home/badr/www/cpmove-badr.tar.gz

العملية الثالثه
عندك واحد يبي ينقل موقعه عليك وش تسوي ؟؟
خذ رابط البكب حقه وادخل على الشل وادخل بمجلد الهوم عندك واكتب الامر هذا wget وراهـ رابط البكب الي عطاك اياهـ طبعاً الامر هذا امر السحب يعني لو فيه ملف كبير تبي تسحبه لموقعك تقدر تستخدم هذا الامر مثلاً
wget http://www.badr-s.com/cpmove-badr.tar.gz
طبعاً بعد سحبه وش تسوي يا تختور ؟ شف تروح تكتب الامر هذا وهو يسوي المساحه وقواعد البيانات وكل شي وكانك مرجع بكب لموقع بالسيرفر بس لازم تعرف اليوزر نيم حق الموقع قبل كل شي واحنا عارفينه بالمثال انه badr ولازم ما تكون مسوي مساحه للموقع على السيرفر عندك
/scripts/restorepkg badr

هذي بعض الاساسيات كتبتها وانا متكي بالدوام من الفضاوهـ وان شاء الله فيه بعدها كم جزء << وش عندهـ فلم صاير

التصنيف: شروحات | 2 تعليقات |

اي متصفح للانترنت يسمع بفلود السيرفرات وانه اخطر من موضوع الاختراق البعض يستخدم اوامر الدوس مثل

امر ( Ping ) على اي موقع ويتم الاتصال به ولكي ينفع الامر يتطلب عمل الامر من قبل اكثر 20 شخص طبعاً اليوم

انا عندي برنامج يستخدم نفس الطريقة لكن بشكل افضل و اكثر فاعليه من امر البينج ( يعني لا تتعب حالك مع اشحاص كثير )

الي صاير بالموضوع ان هذي صورة البرنامج مع شرحه

بـ رقم 1 يتم وضع البورت الخاص بالموقع – .. إقرأ المزيد…

التصنيف: برامج و تقنية | 17 تعليقات |

اوبنتو , توزيعة هي احد الأنظمة الالكترونية ويطلق عليها لينكس وهي تتميز بـ الخفة , السهولة , الدعم الدائم  ( طبعاً الي يهم هو الدعم الدائم ) التوزيعة هذي اليوم وصلتني من جنوب افريقيا , من خلال البريد ما يميز النسخه هو سهولتها للمستخدمين الجديد لـ نظام لينكس , الي وصلتني الى الان 3 نسخ للاصدار 9.04 نسخه لـ خالي العزيز صاحب الصوت الرقيق والحس المرهف والعاشق الهيمان الاستاذ عمر الحجر  ( مجبور ارفع فيه لانه زعلان )  ونسخه اخذها واحد من اصدقائي والنسخه الثالثه عند المطبعه اخذتها عشان انسخ منها 300 نسخه مع حرق الشعار عليها عشان تكون نفس الاصلية , واذا  اي شخص يبي النسخه يستاهلها يراسلني على ايميلي ana@badr-s.com

التصنيف: برامج و تقنية | أضف تعليقك |

 
لكل منا ذكريات في الماضي وانا كانت لي ذكريات حلوهـ في عاصمة الربيع او باريس حفرالباطن على ما يقوله اخوي عبدالمجيد الشمري صاحب موقع باريس حفرالباطن  وهي تعبر من محطات الحياهـ على ما يسمونها المثقفين   فا قبل حفرالباطن كنت بالكويت وبعد حفرالباطن سكنت بالرياض ثم جيزان ( بوابة المستقبل )  والان مستقر بشكل نهائي بمدينة الرياض فا قبل كم يوم سافرة بجوله سياحية لحفر الباطن ومعي كم واحد من الشباب بحياتهم ما شافو حفرالباطن بس يسمعون عنها فا صارة ببالي اول شي اصورهـ بحكم اني مسوي فيها الولد الي يعرف يصور اللوحه هذا الي تدل على اهمية حفرالباطن مع العلم ان لي ملاحظات عليها وهي ان الي اذكرهـ شارع الملك فهد بحفرالباطن جنب بيتنا وبعد 10 سنوات غيرو الشارع الى هذا الشارع الي هو مدخل حفر الباطن واول مكان رحت له ومعي الشباب هو المدرسة الي درست فيها الابتدائي

طبعاً هذي المدرسة هي مدرسة عمار بن ياسر وهي تعتبر افضل مدرسة درسة فيها لعدة اسباب وهي 1- انها مقابل بيتنا بحفرالباطن 2- ان حسيت اني قوي فيها لان كنت بالنظام والكشافه وفريق المدرسة و فاشل بالمدرسة بس بحاتي ما جبت فيها دور ثاني بالمدرسة او اعادة السنه

هذي المدرسة اسمها كان الملك سعود وهي احد اخطر المدراس في حفرالباطن في وقتها كان لي اصدقى كثيير بالمدرسة ومن اهمهم بادي البادي و فهد الحلو و فهد مبارك و محمد جربوع و حمود مسهوج ( الله يرحمه ) وطلال البادي وفيه كثيير بس المشكله ماني عارف من اذكر منهم على كثرهم   الوكاد انها كانت ايام حلوهـ طبعاً حفر الباطن لها معزهـ خاصه عندي

التصنيف: ترحال | 5 تعليقات |

بسم الله الرحمن الرحيم , اليوم احد اصدقاي اخذ له سيرفر بلوحة تحكم دايركت ادمن وهي تعتبر لوحة من لوحات سيرفرات لينكس مثلها مثل السي بنل الي طبعاً بالبداية لازم الواحد يعرف فروق السي بنل عن الدايركت ادمن ومن اهمها هي ان الدايركت ادمن الدخول لها عن طريق البروت 2222 بعكس السي بنل 2086 و 2087 أو كتابة /whm  وبالنسبه لليوزر الاساس هي ان السي بنل الدخول بـ الروت ( root ) لكن الدايركت ادمن الدخول بـ ادمن
( admin ) طبعاً بالبداية اذا احد عندهـ سيرفر دايركت ادمن بعد استلامه عيب تروح للشركه الي اخذته منها وتقولهم ابي رقم الادمن دامك راعي سيرفر طبعاً بالبدايه نطبق هذا الامر من خلال السيرفر عن طريق الدخول بالروت
passwd admin
مثل الصورهـ هذي

طبعاً مثل ما هو واضح غيرنا الرقم السري الخاص بالادمن الحين نروح للوحة الدايركت ادمن عشان ندخل ونكتب العنوان زي كذا
http://www.site.com:2222
رايح يطلب منا اسم المستخدم والرقم السري اسم المستخدم  ادمن والرقم السري نفسه الي غيرناهـ من خلال الشيل
بعد ما ندخل راح يطلع عندنا باللوحه الخيارات هذي الموجودهـ بالصورهـ
طبعاً هذي مالنا فيها شي الي يهمنا بالموضوع ان نضيف مواقع من خلال  الادمن فــا فيه على اليمين قائمة الي فيها معلومات السيرفر وكم متبقي والباندويث وغيرها فيه فوقها مكتوب Reseller Level نضغط عليه وراح يدخلنا بحساب الادمن مباشرة نختار Add New User بعد ما نختارها راح تفتح لنا نفس الصورهـ
نختار Submit  لاضافة الموقع وفي حال الرغبه بتعديل خصائص البكج نختار Customize

وان شاء الله كان الشرح مفهوم مع اني اعرف نفسي اضيع الواحد بكثر الكلام

تحياتي لكم
الدكتور شخبوط

التصنيف: شروحات | 4 تعليقات |

هذا مقطع لثعبان ( داب او حيه على قولة الشيبان ) كان مشغله واحد من الشباب طبعاً الي اعجبني بالمقطع ان خويي طار عقله ووقف شعر راسه بسبب المقطع مالكم بالطويله لتحميل المقطع اضعط على الرابط بالزر اليمين واختارو حفظ باسم http://www.badr-s.com/badr/atol-htabaan.wmv

ملاحظة ما انصح الحوامل يشوفونه عشان ما تفقد ولدها بسببي

التصنيف: عــام | 25 تعليقات |

اليوم وانا افتح ايميلي القديم لقيت رسايل كثييير تقريباً فول الـ 2000 رساله وفيها نسبه كبيرهـ رسايل جايتني من ناس مضافين انصدمة منهم لانهم فاهمين يعني لو انهم جدد بالنت نقول يمكن لاكن ناس اصحاب مواقع و بعضهم عندهـ سيرفرات مرسلين لي رسايل ارفعو ضغطي فيها ومن ابرزها مشاهدة الرسول بالحلم ان فلان بن علان شاف الرسول ( صلى الله عليه وسلم ) وان الرساله هذي لازم ترسلها لـ 10 اشخاص  طبعاً الي تجيه يبي يرسلها لكل المضافين عندهـ بالايميل طبعا نقول الي يرسلون يمكن عندهم جهل بالموضوع لكن الرسايل الي يقول لازم ترسلها لكل المضافين عندك بالايميل عشان ما ينحذف ايميلك ومحطوط فيها روابط بالهوتميل لكها اذا دخلنا عليها يجي مكتوب The page you have requested cannot be found. يعني توكل على الله الصفحه مهي موجودهـ او خطء والمصيبه الثانيه لقيت ايميلي مشترك بقروبات أباحيه كثيييير ومن الي مشركيني فيها مدري مين يعني لو احد يدخل ايميلي راح ياخذ عني فكرهـ اني ولد مش كويس

طبعاً الفايدهـ منها ايش  ؟ << هذا سؤال يطرح نفسه وبعنف( دققو على عنف    )

طبعاً يستخدمها اصحاب القروبات وغيرهم الي يروجون للاشاعه هذي وهي ان انا  كا صاحب قروب ارسل الرساله للمضافين عندي والاغلبيه ضايفهم باكثر من ايميل او بعض المضافين عندي يتكررون عند نفس الاشخاص الي انا ضايفهم وبعد ما ارسل الايميل مثلاً لـ عبيد وعمر وسلطان عبيد يبي يرسلها لكل المضافين الي عندهـ ومن ضمنهم انا وسلطان نفس الحكايه و عمر نفس الحكايه بهالحاله وش الي صار ؟ الي صار الله يطول عمركم اني عرفت كل المضافين عندهم بدون استثناء واخذ ايميلاتهم من الرسايل الي تجيني واروح اضيفها بقروبي على الياهو او الجي ميل او اي نظام و أزعجهم بالقروب الخاص فيني

لكن زبدة الكلام اذا تكرمتو ترسلون الموضوع لـ 17 واحد الله يزوجكم

أخوكم الدكتور شخبوط

التصنيف: شخابيط | 4 تعليقات |

في كل سنه من السنوات تصير كذبة تكون كبيره وهذي الكذبه بالتحديد في شهر ابريل الي هو شهر 4 بالتاريخ الميلادي ( تاريخ الكفار على كلام العجايز ) طبعاً شهر ابريل طبعاً الكذبه هي حسب الي عرفته عنها بموقع وكيبيديا انها من القرن التاسع عشر يعني كذبة منذ مبطي والكل بدى يسويها يعني مثلاً الشيخ قوقل حفظه الله كل سنه يمحطنا بنصبه تشتهر زيه شهرته يعني قبل كم سنه كذبة الانترنت عن طريق المجاري ( ما تحسون اني متثقف شوي ) وان الانترنت يوصل عن طريقها بسرعه 8 ميجا وكذبة البريد المطبوع الي يوصل لك الايميل للبيت مطبوع ( هذي الى الان الناس مصدقينها ) مالنا بالطويله اخر كذبة وهي الي مشى سوقها الى اليوم وهي مكاين سنجر  وان فيها الزئبق الاحمر ( بسببها العجايز زادة الثقافه عندهن عن الزئبق الاحمر والنووي ) مالكم بالطويله بهالسالفه لكن فيه عندي واحد من خوالي مخه ضارب خرب ماكينة امه عشان بس يكتشف الزئبق الاحمر الي يخفي الذبذبه عن الجوال وطلع مكتشف المغناطيس الاصفر في اليوم الاغبر وهي مهي كذبه لكن نصبه على خفيف فا على كذا خالي الاستاذ عمر الحجر هو مكتشف هذا المغناطيس الي بسببه العجايز ينطنخون ومنهم امي الله يحفظها ما تبي تبيع بأقل من 100 الف ريال لان ولد خالتي يتمصلح مع امي يبي يشتريها بـ 5 الاف ريال  وانا المستغرب المهبول يبي يبيعها على منو بس شكله واحد من الذين تمشي عليهم مقولة ( رزق المهبل على المجانين )

والسلام ختام

أخوكم البروفسور | انا  <<< وش عندهـ

التصنيف: شخابيط | 5 تعليقات |

التصنيف: شروحات | 5 تعليقات |

فلـ،،،ـفه قلم

لا أحد يستحق فتح الغطاء ..

زعلآن عشآن كوب ..

يآعمممممممممي

رآحت دول وما أحد زعل .. إقرأ المزيد…

التصنيف: شخابيط | التعليقات مغلقة |